أودَا أَجُپَّا تِأَلَّا تُوغُنْڠَا،نِىمَا لُوڠُنْتِنْ كَمَا، نِىمَا غِرِغِنْتِنْ كَمَا.
تِيغَيِنْڠَا أَلَّادَنْڠَنِي، سَلِّنْدُو كِيسِيِنْڠَا يِمِّنْكَمَّا، كِىبِى أَنَّبِيِنْيِمِّى ڠَنْتَا أَهَلِّى.
أَوَ أُوْكَمَّا أوْنَنْ سِىوُوْ تِي أُوْدِينَنْعَا قُوْ أَلَّا ڠَرَ أُوْنْيَامَرِي مُوْغُوْبِى، قَا كَمُّغُونِي أُوْڠَا سِىوُوْنُوْ تِأَيَا، نَأَتُوْغُوْتِي أُوْڠَنْتَا أُوْدِينَنْ قَرَنَا تِإِمُوْغُونْعَا، أُوْنْتَا فَامْيِىنْ مُنْدُنُو أَدِي. سُوْرُوْنْعَتِنِي يُوْغُوْنُو ڠَنَا قَرَا كِىنْعَسِى، إِنَنْيَا تُوَانُو أَدُوْ قَرَمُوْغُوْنُ. إِنْكِى تِرِنْدِى كَتَّا كُويَا، يَالَا قَوَدَڠَنَا كَتَّا إِيَا، بِرَمْبِى إِڠَنَا يِلِّى بَا؟ أَنْڠَنَاتِي إِيُو، كِىنْدِي خِىرِي. كِىنْڠَهِىتِي لُوْجُرُونْتَا أَمَّغَا. تُوْنْڠُو تُوْنْڠُو، أُوْڠَنَا هُوْنْ قَنُوسُ، سِىرِىنْتَا أُوْ سَامَنَا أَيِي.
أُوْڠَادُوْ فِمْبِى قَرَنْعِى، كِىنْيَنِي قَرَنْعِنْ دُوْ فَامُيِى قُرَآنَنْدِي، هَرِي أَڠَا انْيَانَا هُوْنِّىيْ، أَدُوْ فَارِنْ هَدِيسِىنُنْعَا، هَرِي أَڠَا انْيَانَا هُوْنِىيْ، أَدُوْ أَلَّا فَارِنْ سِيرَنْعَا، أَدُوْ بَتِيِى مُوْغُوْ بِىنُو، أَڠَنْتَا سِيرُوْنُوْ أَفَلِّى أَدُوْ أَرَابِىنْ قَنِّنْعَا، هَرِي أَڠَا انْيَانَا هُوْنِّىيْ، أَدُوْ سِلَامَاغُنْ تَارِيخُنْعَا، كِىمْڽَلِّى، أَنَّا كُوتِّىنْ تُوْغُوْ تُوَانُنْ مَّغَا.
سِلَامَاغُنْ يَنِي، دِينَا تُوْنْڠُنْتِىنْعَا، أَلَّا ڠَنْتَا فُوْفُوْ رَڠَنَا أَفَلِّى، أُوْفَابَ آدَمَ دِينَا، أَدُوْ نُوحَا، أَدُوْ إِبْرَاهِيمَا، أَدُوْ مُوسَىٰ، أَدُوْ عِيسَىٰ، أَدُوْ أُوْأَنَّبِيِنْيِمِّى مُحَمَّدُ، كِيسِييِنْعَا إِسُو كَمَّا. كِىنْدِي، أَنْْعَنَا كِىنْتُو، نَا أَفَامُو، أَوَأَنْجِيدِنِي لِمَانَنْكَاغُنْعَا، نَا أَنْلَّاتُونْدِي نَافِقَاغُنْعَا، نَاأَتُوْغُوْتِي نَافَغِنْتَا فُوْفُوْ فَامُنُو.
أَنَّاأَتُو، لِمَانَنْكَاغُنْ لِنْڠِنْيَانِ، سِىرِىبِى ڠَنَا، أَلِنْعُوْيِىنْ كِتَا، كِىنْيَا انْيَاغَلِنِي تِيأَيَا، أَنَا أَلَّا نُوَارِي، أَنَا أَدِىمَا، أَنَا دُرُوْغُوْتُوْ أَكِلِّىنْعَا، أَنَا أَغُوْنِي إِنْيَا كَافِرُنْعَا، أَنَا إٍدُغِرِي سِلَامِنْعَا.
أَنَّا أَتُو، أَلَّادَ مُومِنِنْ تِيڠَا، نَا نَافَغِنُنْ تُوْغُوْنْ بُوْنُوْنْدِي. كِىنْدِي، أُوْنَا دُو تَنْڠَا، بَكَّا نَافِقَاغُنْعَا، قُوْ صَحَابَنُكُو مُوْغُوْنُنْعَا. أَلَّا ڠَنَّا أُوْدِىمَا.
والسلام.
أبوعبدِالله جَغتى
١٧ مِنَنْقَصُوْ ١٤٤٣
١٨ مايو ٢٠٢٢