أودَا أَجُپَّا تِأَلَّا تُوغُنْڠَا،نِىمَا لُوڠُنْتِنْ كَمَا، نِىمَا غِرِغِنْتِنْ كَمَا.

تِيغَيِنْڠَا أَلَّادَنْڠَنِي، سَلِّنْدُو كِيسِيِنْڠَا يِمِّنْكَمَّا، كِىبِى أَنَّبِيِنْيِمِّى ڠَنْتَا أَهَلِّى.

سِلَامَاغُنْ جِكُّنُوبِى سُوْرُونْ كِيلُنْڠَا بَكِّيَ، سِيرُويِى كَتَّا تَاغَنْلِّىمُّو، قَا، أَفَامُو نَنْتِي، تَاغَنْلِّىمُّنْ پِىتِي، كِىبِى كَنْڠَا كَرِنِ أَنْكَنْعَا بَانِىيَا، تَاغَنْلِّىمُّنِّي، كِىبِى ڠَا كَرِنِي أَنْعَا، نُوقُو دَمْبِى سُيْ، كَنْعَا مَا سَغَنْعَا، تِىرِىنْدِى مَا تَاغُيِى، أَنْيَا هَقَتِ ڠِلِّى، مَا هَقَتِ دِىپِّى.

أَلَّا دُوْ أَوْنْيَامَرِي سِيرُويِى، كَتَّا تَاغَنْلِّىمُّو، أَفَارِى سِىنِّى كِىدُوْ أُوْڠُونْغُوْ إِتُوْرَنْدِىنْعَا، أَڠَنْيَا سِىرِى دَمْبِى سُيْ، سُنْتُوْغُوْ مَارِىمُّو، أَدُوْ سِلَامِنُو.

كِىنْدِي، أُوْرَنْتَيْ ٱنْيَغَمِنْ پِتَّنَا إِنُوْقُنْعَا، نَا قَنْقُوْرِىهُوْنُنْ قَارُنْدِ، نَنْتَاغُ إِبَاهِىلَّقِّنْعَا، مَاكِنْعَا، فُوْفُوْ دَمْبِى، أَڠِي إِتُوْرُوْنُوْ، قُوْمِي أَڠَا أَنْقَا تُوْرُوْنُوْ مُوْغُوْبِى، إِڠَنَا أَدَوَرِي أَنْعَا.

أُوْڠَنَا أَلَّا فَارِىنْ سِيرَنْقَرَا أَدُ إِصَحَابَنُو، أَدُوْ تَابِعُونَنُو، أُوْوَا مِسَالِىنْ ڠَبِنْ ٱنْعَلَّا، إِڠَا إِتَاغَنْلِّىمُّنُنْ دَرُوْنُوْ، مَا كَافِرِنُنْڠَا رُوْنُوْ سِلَامَاغُنْدِي، تِي كِىنْ سَبَبُنْعَا. أَلَّا ڠَنَّا أُوْجِكُّنُنْ چِىرُونْدِي.

والسلام.

أبوعبدِالله جَغتى

٢٤ مِنَنْقَصُوْ ١٤٤٣

٢٥ مايو ٢٠٢٢